非國盃假假地都係洲際大賽，但齋講戰情真係冇咩人關心，其實當地從足球秩序到文化都有好多嘢估你唔到，其中幾位神龍近日就成為網絡熱話。

加納門神拉薩克（Brimah Razak）每次披甲，龍門隔籬總有隻蜘蛛俠公仔傍身，驟眼睇仲以為係咩巫術？原來呢隻蜘蛛俠係佢愛兒Nasser最鍾意嘅公仔，擺喺度就好似囝囝喺佢身旁帶嚟運氣同力量。至於塞內加爾周二喺B組末輪逼和阿爾及利亞2:2保住首名，門將K尼戴耶（Khadim N'Diaye）為咗力保和局，竟然喺開龍門球嗰陣右腳「click」落左腳度，就咁跌低扮受傷，最終嘥時間得嚟仲走甩黃牌，抵到爛。

不過，非洲門將背負住國民期望，呢一關唔易把守架，好似多哥38歲老牌門將阿加沙（Kossi Agassa）因為次輪分組賽輸畀摩洛哥1:3嗰陣犯錯，屋企即刻俾球迷大肆破壞，搞到佢要匆匆飛返家鄉善後。非國盃八強已經全部產生，戲碼分別係布基納法索對突尼西亞、塞內加爾對喀麥隆、剛果民主共和國對加納、埃及對摩洛哥。