老友E姐在中環經營專賣名牌貨尾貨版的時裝店，本來取價經已很公道，E姐還給我的特別多折扣，高檔貨H&M價錢，所以一直是我的不二之選。可惜生意實在越來越難做，我倆見面互吐苦水講到傷心激氣之處，幾乎抱頭痛哭。
她說業主加租狼夾狠，完全沒有議價空間，嫌貴唔該過主。但要搬談何容易，裝修費幾貴？還要只肯簽兩年約，條數點計都計唔掂，進退兩難。周轉對小商戶來說是非常困難，E姐坦言店內的貨就是她全副身家。以往入貨有幾個月數期，現在見錢才放貨，反正不愁沒有賣家。遲一兩個禮拜交租管理處就話出律師信，但生意總有淡旺，惟有借錢周轉。還有員工薪金強迫金保險各樣開支，壓力實在大，日日望着門口對着收銀機發愁。
自退休老闆手上頂入這盤生意，E姐嘆息這十多年來講真沒有幾多好日子過，但一把年紀出去搵工誰會請？又能夠搵得幾多？為生計只好想盡辦法經營下去，小小企的苦況之苦，實不足為外人道。