【上年寄錯飛】StubHub自稱出售全球門票 五月天迪士尼騷炒到6千
五月天迪士尼StubHub
亞博同StubHub簽定合作協議,同快達票講拜拜,唔少相關人士都憂慮,以後運作會變成點。
StubHub係一個提供平台與球賽、演唱會等門票交易,喺佢個網站可以購買世界各地球賽同演唱會門票;最令人印象深刻,係2017年5月,StubHub以贊助商身份,贊助傑志對熱刺表演,承包賽事8,000張門票。球迷透過官方售票網站(即StubHub)買飛,但比賽前一日仍未收到門票,疑因「貼錯地址」而滯留喺郵局「死信部」。
另一單為人熟悉嘅係StubHub以中介角色,放售由不同途徑收集嘅賽事門票,去年英超亞洲盃,決賽日原價$720嘅門票,喺StubHub網站被炒高至$4,880元,足足炒貴六倍。
StubHub又於其網站上表明,門票價格可能高於或低於正價,而涉獵嘅種類非常多,體育賽事門票包括歐洲四大足球聯賽,甚至係暑假舉行嘅世界盃門票。演唱會方面,嚟緊五月天喺香港迪士尼演唱會都有飛,不過價錢絕對唔平,舉個例,5月6日星期日一場,原本於位台前嘅VIP區門票正價係$1,180 ,喺StubHub最低要$1,977,最高要$6,080。