李八方online︱瑪麗醫院最資深醫生楊紫芝90大壽 港大搞生日會張翔李國章齊出席
瑪麗醫院楊紫芝香港大學楊紫芝90傑出青年女學者獎
港大日前為楊紫芝舉辦網上生日會,港大校長張翔同校委會主席李國章等都有出席。港大Facebook短片
行醫超過60年嘅香港大學內科學系榮休教授楊紫芝,日前獲港大舉辦網上生日會,慶賀佢踏入90歲大壽。港大(HKU100) 喺facebook公佈早前為楊紫芝賀壽嘅短片,出席者包括港大校長張翔、前校長徐立之、校委會主席李國章、副校監李國寶、校董梁智鴻、醫學院院長梁卓偉同多名港大教授。片段所見,生日會當日好多人都有透過網上視像為楊賀壽,包括陳祖澤、高永文、范徐麗泰等等。
港大又以「港大之寶」形容楊教授,宣佈成立「楊紫芝90傑出青年女學者獎」,表揚佢對港大同社會嘅貢獻,同時鼓勵年輕女學者投入研究領域,追隨楊教授嘅卓越學術成就。校方會每年揀出助理教授或副教授成為有關得獎者,當中包括1個係來自醫學學科,另1個來自其他學科,年齡40歲以下。
港大引述楊教授嘅生日感言表示,大家為佢慶祝90歲生日,都係慶祝港大嘅成功,「因為有美好嘅人,創造咗呢個美好嘅地方」,她喺過去60年,喺港大唔同崗位服務,認識眾多好友,全靠眾人齊心協力,先有港大今日成功。
楊紫芝喺1947年以16歲之齡,入讀港大醫學院,1953年畢業,之後一直喺港大同瑪麗醫院工作,到1999年正式退休。其間佢曾經做過醫學院院長,係第一個擔任呢個職位嘅女性;1985至1993年間,佢都先後擔任香港大學副校長同高級副校長。佢退休後仲以義務顧問身份為病人診症,按此推算,佢係醫院內資歷最深嘅醫生。港大醫學院網頁顯示,楊教授係榮休教授兼名譽臨床教授,而家仍然有教學工作。
-----------------------------
-----------------------------