早前盛傳婉拒咗娥特邀請出任政務司司長，選擇離開官場專心照顧媽媽嘅前公務員事務局局長張雲正，早前同「80後」靚女新聞主任結婚前，接受咗母校聖類斯中學慶祝創校90周年嘅校刊訪問，喺訪問中披首度親身披露點解要離開官場同成家立室。

張雲正話，今年媽媽已經95歲，好難得身體仍然唔錯，但佢知媽媽因年紀關係，身體機能始終有退化一日，所以在任政府時，就問自己一個問題：「就係媽媽未來5年珍貴啲，定自己嘅5年珍貴啲？」，結果張雲正同自細已照顧佢嘅姐姐，以及一早睇好佢會官至處長（其實張雲正差啲有機會做埋司長）嘅大姐夫傾過後，決定退出官場，花多啲時間陪屋企，形容至今覺得係「明智同理性的決定」。

張雲正又自爆，離開政府後，自己仲有三大「任務」，包括陪媽媽去加拿大旅行、見吓好耐未見過的親戚，其次就係要搵個中文流利、識照顧老人家嘅家傭。至於第三項「任務」……就係佢10月尾終於完成咗嘅人生大事，同女友拉埋天窗。張雲正話，媽媽一直希望佢早日成家，因為媽媽怕佢年紀後大咗，日後無人可以照顧佢，令佢覺得媽媽真係好偉大，決心盡快達成媽媽呢個心願喎！