護級成功又如何 屈福特季尾送走馬沙利
英超屈福特護級馬沙利英國足球
屈福特禮拜三發表聲明,領隊馬沙利教埋下場對曼城嘅比賽就會離隊。
屈福特主席杜斯貝利發聲明:「董事局同馬沙利傾過未來目標同埋志向後,決定佢會喺16/17球季最後一場比賽完結後,唔再擔任球會主教練一職。我哋好多謝馬沙利同佢團隊過去一年為屈福特作出嘅貢獻。」屈福特今季最後一場比賽係下周日英超煞科主場對曼城,呢場將會係馬沙利嘅告別戰。
55歲嘅馬沙利係意大利籍教練,舊年暑假接替科利斯擔任屈福特主帥,簽約三年。馬沙利今季帶領屈福特嘅成績麻麻,聯賽一直排中下游,37場英超得11勝7和19負嘅成績,暫排16位,總算護級成功。喺盃賽方面,屈福特喺英足盃第四圈出局,而英聯盃喺次圈就玩完。