周六東亞錦標賽決賽周男足賽事開打，中國隊正選派出六個U23成員對陣南韓，成場波就好似玩坐山車咁，早早憑住第一次代表國家隊上陣嘅韋世豪領先一球，但係好快畀南韓連入兩粒，半場落後。好彩下半場尾段于大寶攻入一球，令中國隊最終以2:2逼和南韓。上次喺三月嘅世界盃外圍賽，中國隊罕有咁贏南韓，今次用後生仔為主又打和南韓，唔通「恐韓症」已經好返？

中國有傷在身嘅張琳梵冇入選23人大名單，而廣州恒大冇球員入選今場正選，領隊納比派上六個U23成員：其中劉奕鳴、何超、楊立瑜同埋韋世豪都係第一次為國家隊上陣。本來以為練兵為主，點知打落醒神。開賽先至九分鐘，中國隊喺右路低球傳中，韋世偉射右下角網仔，令中國隊先開紀錄。不過四分鐘之後，南韓就追平比分，李在城喺右路突破入禁區，吸引包括門將顏駿凌嘅中國隊球員包夾，佢傳畀冇人看管嘅金信煜，後者輕鬆射入。19分鐘，南韓就反超至2:1，南韓大腳傳前到禁區，金信煜今次投桃報李，頂畀李在城拗腰破網。場波要到77分鐘先再有入波，中國隊左路傳中，于大寶頭槌中楣底彈入，最終逼和南韓。

而另一場，東道主日本隊憑住井手口陽介，喺補時最後一分鐘禁區頂勁抽，1:0絕殺北韓隊，暫時排榜首。

----------
係你！打造星級球隊，征服各地聯賽！立即加入『BFB CHAMPIONS 2.0』！
http://bit.ly/2xrTKGM