中國三大影音平台愛奇藝、優酷及騰訊視頻，噚日同正午陽光、華策影視、檸萌影業、慈文傳媒、耀客傳媒、新麗傳媒六大影視製作公司聯合壓價，抵制天價片酬演員，目的係促進影視行業健康發展（新聞連結： https://bit.ly/2MF8KZy ）。原本范冰冰有份做股東嘅唐德影視公司冇參加壓價行動，但今日唐德影視宣佈加入。

今日有大陸電影人向《蘋果》透露，三大網絡平台購買電影版權費，總額不得超過5,000萬人民幣（約5,740萬港元），盡量控制喺2,000萬人民幣（約2,296萬港元）以內。原來電影嘅網路版權都係按票房10%左右嘅額度收取，《紅海行動》大陸票房超過30億人民幣（約34.44億港元），以1.7億人民幣（約1.95億港元）賣咗網路版權俾優酷，但喺網站流量嘅表現平平，幾個網絡平台年年蝕10幾億，終於促使佢哋聯手壓價。

今日平台更詳細交待劇集只喺網上獨播，每劇費用不得超過800萬人民幣（約918.5萬港元）1集，先網後台嘅獨播劇不得超過600萬人民幣（約688.9萬港元）1集，先台後網就唔可超過500萬人民幣（約574萬港元）1集。

呢個新措施，肯定令電影同劇集收入大縮水，所以o依家影視製作全部停頓咁滯，只有網絡大電影同網劇係越拍越旺，因為成本低，唔使搵大卡士或一級幕後精英合作，2、300萬人民幣（約229萬至344萬港元）就可以拍一套，有唔少公司會投資，聽聞唔少大電影公司索性搞呢啲，唔使求班大卡士合作，又要俾高價，又要受氣，仲唔係一定賺錢。

精選娛聞，喺晒《娛果》
http://fb.com/appledailyent