當年今日
關於我們

我的朋友許爸爸

蘋果日報 2002/02/17 00:00


許志安有五個哥哥、三個姊姊,他排行最小,自從母親過世後,他便一直跟父親同住,對八十四歲高齡的老父非常孝順。老吾老以及人之老,安仔對老人家亦十分有愛心,只要有時間,他經常會到老人中心唱歌。
許: 我覺得啲老人家曾經對社會有好大貢獻,所以我對一啲住喺老人院嘅老人家會特別關心。

與古爸爸老友
許: 而我同爸爸嘅關係就好似朋友咁相處,我老竇好似個大細路咁,有次梁炳(梁漢文)嚟我屋企坐,佢忽然問人哋一個月搵幾多錢,搞到我都唔好意思,所以每次請朋友返屋企坐之前,我都要事先同佢講,唔好又問我啲朋友有幾錢收入。
記: 你咁忙,平時有冇時間陪佢?
許: 我都會盡量抽時間陪佢,不過佢自己都好識打發時間,得閒佢就落公園同古天樂爸爸傾偈,消磨時間,佢哋係喺公園識嘅,初時老竇都唔知佢係古仔嘅爸爸。得閒老竇又會同啲孫玩吓。
記: 𠵱家你大部分時間擺喺事業度,「最受歡迎男歌星」又攞埋,嚟緊發展會係點?
醉酒可以減壓
許: 其實攞咗呢個獎,先至係事業嘅一個新開始,今年我希望擺多啲時間去拍戲,以前拍嘅戲成績唔係咁好,我以後接戲會小心啲,我相信自己喺電影方面都可以有一番作為。
記: 會唔會覺得壓力大咗?
許: 壓力的確比以前大,但我自己識得做心理調節,以前發展唔係咁好,我都有諗過轉行,又成日同梅艷芳佢哋蒲吧飲酒,直至有次忽然覺得自己好似唔屬於呢啲地方,我先至遠離呢啲地方,不過𠵱家我間中都會喺屋企或酒吧同啲朋友飲吓酒,喺屋企會比較盡情,飲醉咗就大覺瞓,其實都係一種減壓方法,又或者去打吓桌球,個人都會好Relax。