第九場騎練雷神同蔡約翰合作憑「詠彩繽紛」捧走沙田一哩錦標,到第十場三班千四米,兩人諗住贏埋3.2倍「有心人」呢匹餐士馬,但大摩硬係唔放過佢哋,「有心人」直路雖然左穿右插都趕得切望空衝刺,卻被大摩同郭能合作馬「巨無霸」螳螂捕蟬,拉士從大外欄如飛殺上,將「有心人」輕鬆擊敗,三歲澳洲自購馬「巨無霸」及時於馬季結束前,以5.8倍打開來港後勝門。
「巨無霸」由最索女馬主玩具大王蔡志明千金蔡加怡擁有,她自四年前三月尾贏出「萬能駒」後,近四季首度揚威凱旋門。而佢細佬蔡加讚,早前亦在田草勝出名下馬「車神」,蔡志明呢對寶貝仔女,今季幫家族攞咗唔少養馬Face。
「巨無霸」是鞍上人郭能在港第100win,近四個賽日他勝出「勁勇威龍」、「兵工闖」、「珍珠有利」、「你知我心」及「巨無霸」,手風大順。
今場三、四名都係華將座騎,順序梁家俊「海嵐一號」及黃皓楠「英明神勇」,前駒位置冷到343.5元,四重彩因此派到十六萬三千幾。
賽後有段小插曲,事緣蔡加怡老公陳漢聰着住條爛牛仔褲,馬會人員一度疑似阻止他拉頭馬,擾攘後終獲放行,可以照同老婆影威水相。其實類似情況3月曾經出現,不過當時主角「心花怒放」馬主蘇智恒之藝人朋友謝東閔、張振朗始終因衣著問題,冇得拉頭馬。