仲記得舊年夏天係唔少多年籃球迷嘅憂傷仲夏，因為陪伴成長嘅拜恩（Kobe Bryant）、鄧肯（Tim Duncan）同加尼特（Kevin Garnett）都先後離座。不過，有一張熟悉嘅面孔提前約定各位下季見，就係表示願意履行合約打到40歲嘅「德國槍」奴域斯基（Dirk Nowitzki）！

奴域斯基日前接受美國《ESPN》訪問時表示：「我諗會（2017/18球季繼續披甲）。除非未來幾周或者休季前幾周有重大轉變，但我暫時未睇到。」由20歲打到40歲，Dirk都話值得為呢個里程碑奮鬥：「20係一個好「冧巴」。我諗留喺一隊波20年係一個幾好嘅成就，就好似拜恩所做到咁。而且出年夏天我就40歲，喺聯盟度過由20到40歲，都係我所期待嘅事。」或者係受大哥鼓舞，就算奴域斯基喺周五常規賽只係得10分，但球隊喺5位正選得分全部達雙位數下，主場以104:100險勝灰熊，近4場贏3場。