【新增回應】

失婚陳貝兒主持嘅大台節目《嫁到這世界邊端》，噚晚播出最後一集，佢特登約埋幕後團隊打邊爐睇直播，繼續開live，網友留言追問幾時開第二輯，《嫁》監製張志明都話啱古仔就會開，仲話都會用番貝兒。不過原來貝兒呢次主持係執二攤，有指最初人選係江美儀，有指檔期唔啱，貝兒冷手執個熱煎堆，咁啱佢當時分居，見到人哋咁幸福，佢都感懷爆喊幕前，講起對愛情感受就真情流露，難怪貝兒每晚喺facebook開直播，網友都入嚟送祝福。

貝兒今日喺facebook撰文，抒發咗佢心底愛情觀：「我相信每一個喺我哋生命中出現嘅人都有佢特別嘅原因。有啲可能會留得來啲、有啲可能只係一個過客。不過無論呢一刻你身邊有冇人，只要珍惜眼前每一個開心片段、珍惜每一個當下、繼續相信。愛，一定會喺最適當嘅時候，喺世界某一個邊端出現。」

貝兒仲話：「港女不怕死、為咗愛、係呀我哋真係癲㗎，繼續相信、繼續向前，一定會喺世界某一個邊端發現愛。呢個唔係終結、而係另一個開始。」講到執二攤，貝兒話唔介意，佢今日回覆傳媒時話：「公司好多出色主持，呢次節目主題關於愛，邊個做主持，觀眾都一定會有共鳴，好彩公司俾咗呢個機會我。」