現年29歲嘅趙又廷，同34歲嘅女友高圓圓拍拖3年，呢段姊弟戀多次傳出婚訊消息，內地傳媒近日更盛傳高圓圓懷孕，兩家人正積極商討辦喜事嘅細節，兩個人有機會喺今年雙囍臨門。

由於高圓圓最近拒接新戲，早前又去到台北參加「準奶奶」趙媽媽嘅生日慶祝聚會，令到外界猜測兩個人正準備雙囍婚事。高圓圓係一個孝順女，有時間就會去照顧長期病患卧床嘅媽咪，所以佢唔太鍾意離開北京太耐，佢同男友趙又廷見面相聚，都係互相飛嚟飛去探對方，相當頻撲，1月頭趙又廷先飛北京會女友，喺農曆年高圓圓就去到台灣探班；過完年兩人又即刻喺北京蜜會，糖黐豆咁，見少陣都唔得。

到前幾日，又被發現兩人又重遊定情地寧波，見到趙又廷幫女友擔遮、又攬腰，盡顯細心一面，不過見佢兩個攞住杯咖啡漫步，建議圓圓如果真係有咗就唔好吸收咁多咖啡因喇，對個胎冇益0架！

趙又廷喺下月會到內地拍民初電影，佢經理人回應話趙又廷工作檔期排得滿滿，唔好話結婚，連唞氣都唔得閒，同時又否認高圓圓懷孕，話趁情侶趁放假約會正常不過，更反駁謂如果圓圓真係懷孕，點可以成日飛嚟飛去咁操勞。

至於圓圓嘅經理人話懷孕只係傳聞，依家幫佢傾緊新戲，可能隨時會入組開工。高圓圓啱啱拍完電視劇《咱們結婚吧》，同謝霆鋒合作嘅新戲《一生一世》，正值放假，呢兩部戲都咁好意頭，話唔定真係「一生一世」、「咱們結婚吧」。