韓國男團Super Junior（SJ）嘅成員近年陸續入伍，今日利特率領希澈、藝聲、神童、銀赫、東海、始源共7人喺亞博館開騷，係始源喺愛犬涉咬死人爭議後首度來港。

晚上7時05分左右，螢幕播出VCR時粉絲已經尖叫聲不斷，隨後身穿黑西裝嘅SJ現身勁歌熱舞《Black Suit》打頭陣，當演唱《Scene Stealer》前，銀赫solo跳舞時粉絲中叫其韓文名，SJ更行到延伸台前獻唱《Mamacita》，近距離見粉絲，而粉絲就高舉藍色螢光棒以示歡迎。

隨後SJ以廣東話「Hong Kong你好」及普通話「我們是Super Junior」打招呼，之後又逐一以韓文、普通話打招呼，神童表示之前入伍好耐冇參與過演唱會，又大讚港迷靚女咗。至於東海表示：「親愛的寶貝們，我是東海。」隨後拎出貓紙講廣東話：「有冇掛住我啊？大家好靚，大家好sexy，錫錫東海。」立即冧死粉絲。

藝聲則稱彩排時覺得場地好大，曾擔心唔full，見到粉絲後好感動。而始源就表示：「好久沒來香港，一直很想來香港，很想念你們。」希澈稱：「一嚟香港就會諗起邱淑貞、張智霖袁詠儀夫婦及你哋。」再引起粉絲大叫。

銀赫就自稱自己係小鮮肉，引爆全場大笑，更多次晒廣東話如「好滾（感）動」、「好驚（勁）」，不過發音唔準冇乜粉絲聽得明，佢立即扮嬲叫粉絲要學好廣東話；利特就稱粉絲叫「公主」，又賣口乖香港嘅粉絲比其他國家粉絲靚。之後7子除低外套演唱《Shirt》，利特更掀起衫晒肌誘粉絲。

最港電影大獎投票網址
http://bit.ly/thekongestfilmawards

更多韓流，喺晒《娛果》
http://fb.com/appledailyent