新一年度立法會上星期復會，各事務委員陸續選舉正副主席，由於泛民建制今次拒絕協調，每次委員會選舉，幾乎都爆發大戰。不過，噚日人事編制小組委員會選舉副主席時就爆冷，民建聯蔣麗芸突然提名人民力量陳志全做副主席，更因為冇其他提名，慢必自動當選。

噚日朝早人事編制小組委員會同工務小組委員會分別選舉正副主席，其中喺工務小組委員會，民主派一如以往互相提名對方參選主席，而建制派就只係提名盧偉國競逐連任，最後由盧偉國當選。而副主席選舉，民主派原本屬意朱凱廸選副主席，但建制派就支持莫乃光，最終由莫乃光以26票當選。

話明布照拉

喺人事編制小組委員會就出現戲劇性一幕，選副主席期間，「元秋」蔣麗芸提名慢必陳志全做副主席，主持會議嘅民建聯周浩鼎都笑咗一笑，最後因為冇其他提名，慢必自動當選副主席。慢必之後同八方講，對於自己當選好意外，稱事前同建制派冇共識，「估唔到我會係建制派接受嘅人選」，佢話自己雖然當選副主席，但都會照拉布，又話會用副主席權力阻止加會同撞會。

元秋突然對慢必另眼相看，一定有古怪。據了解，建制派原本屬意公民黨楊岳橋連任副主席，但元秋突然「玩嘢」提名慢必，建制派亦始料不及，有建制派之後明言對結果好不滿，但係都恨錯難返喇。

李八方