阿仙奴下星期日（9月17日）作客史丹福橋球場嘅英超聯賽，將會由球證米高奧利華（Michael Oliver）執法，唔少槍手球迷對呢個安排唔係好滿意，因為奧利華隨時會係對手車路士嘅「第12人」。

根據統計數字，奧利華執法嘅英超賽事包括有阿仙奴嘅總共有19場，槍手贏到嘅只係得四場，勝率只係得21%。另外，上季阿仙奴只係拎到聯賽第五名，雖然佢哋煞科戰係贏愛華頓3:1，但呢場由奧利華執法嘅比賽就有哥斯尼領紅被逐，而球隊上季喺4月輸嘅兩場比賽都係由奧利華執法，呢場兩場分別係作客以0:3輸畀水晶宮，同埋作客以0:2輸畀熱刺。奧利華執法嘅英超比賽槍手勝率得21%，係隊史喺英超所有球證（至少執法15場）之中最低，難怪「廠迷」對於由佢執法對車仔嘅比賽咁擔心！