當年今日
關於我們

靠潮流生意 做搵銀英雄

蘋果日報 2002/01/22 00:00


經紀李講起,黃埔個冬季嘉年華一個月就做咗八千幾萬生意,官方公布淨賺一千萬,咁嘅時勢去邊度搵?經紀李話其實點止賺一千萬,嗰批遊樂機器今次一鋪歸本,除現金外重賺埋生財機器,認真威水。
除咗冬季嘉年華外,專整玩具嘅米搞L上個月搞咗個玩具騷賣個人作品,引來幾千人排隊,行內八卦佬同佢埋單,估計3日就做咗過百萬生意,利潤估計七成;往時被人睇唔起嘅公仔佬今日終於發威,證明只要肯用腦又係掂。
重有旺角HTK網上賣玩具可做到15萬營業額,利潤平均兩成半。另一間網上賣「沖涼馬騮」日本衫褲精品嘅一人公司仔,規模細到老闆要親身去地鐵站交貨,但竟可以做五、六萬生意一個月,醒過好多零售。又傳聞「肥麥」卡通票房千三萬,經紀李話:作者發咗達都冇人知。
又話經濟好差嘅?聽完以上傳聞又唔多似噃!經紀李話世界真係變咗,搵錢方法亦唔可以一招到老,以上嘅搵銀英雄都用反傳統方法做生意。寧欺白鬚公,莫欺少年窮,眾英雄曾受盡白眼,捱到今時今日終於淡巿發威。

主持人:大食Jack
八卦熱報:[email protected]