容祖兒（Joey）和黃偉文（Wyman）一向老友鬼鬼，兩人除咗不時喺音樂上互有合作外，估唔到平時佢哋都鍾意約埋一齊shopping，交換置裝心得，可能Joey見Wyman周不時都會為圈中藝人如鄧萃雯覓戰衣，所以都乘機向好友偷吓師，前日黃昏Joey同Wyman夥同幾個友人現身銅鑼灣加寧街，戴上冷帽嘅Wyman同素顏上陣嘅Joey到I.T購物，離開時個個都一袋二袋，似乎趁家減價好時機狠狠血拼一番。

狂煲電話粥

可能佢哋買嘢買到口乾嘅關係，一行數人就到附近嘅喜喜冰室買外賣飲品，雖然Joey已係天后級人馬，但佢就唔介意企喺路邊等外賣，仲全程手機不離手，狂煲電話粥。買完外賣之後，佢哋就移步到百德新街上車，不過揸車嘅司機就有啲危險，由於架車泊咗喺一處凹位隱蔽位置，當司機想將架車掉頭轉返出嚟嘅時候，竟然冇留意有機會撞到逆線嘅對頭車，就咁掉頭出嚟，架車仲好霸道咁橫跨咗兩條行車線，相信坐喺後座嘅Joey都嚇親，認真牙煙。
此外，Wyman前日約完Joey，晚上就約咗鄧萃雯食飯，佢仲上載咗同雯女嘅合照，仲寫咗：「我為她選一條裙子，她請我吃一頓晚餐，在這個大家以為爾虞我詐的娛樂圈，其實還是有很多純潔美麗的互動的。幸會九姑娘！」