古天樂、大陸女星馬麗、童星劉楚恬、黃星羱，導演陳木勝今日喺北京宣傳新片《喵星人》，電影故事講喵星人「犀犀利」乘坐飛船到地球，一心打算展開侵略，但陰差陽錯成為古仔一家嘅新成員。

已經有幾年冇拍喜劇嘅古仔，戲中同犀犀利鬥法大放笑彈，佢笑話自己變成妻奴、孩奴、貓奴。古仔話：「做一個好爸爸之前要先做一個好丈夫，即是妻奴，所以我喺電影中日日被太太鬧，但依舊好愛佢，之後先至係好爸爸（孩奴），會盡可能去滿足小朋友一切合理需要。」至於貓奴，近日古仔帶犀犀利四出宣傳時，都愛護有加。

古仔喺現場仲同飾演佢對仔女嘅黃星羱與劉楚恬，以及犀犀利一齊玩默契遊戲，最後古仔再邀請台下小朋友一齊玩二人三足，仲對小朋友細心照顧，連陳木勝導演都話古仔豎立咗一個好爸爸形象。