唔到你唔服,薑真係越老越辣。去季意甲冠軍國際米蘭,憑費高同基斯普嘅精采表現,玩謝主隊莫斯科中央陸軍之餘,亦顯示佢哋夠薑夠辣嘅風格!
中央陸軍由祖奧32分鐘先開紀錄;滿以為係好開始,豈料52分鐘,國米防中甘比亞素頭槌頂前,成班陸軍守將「震騰騰」跣後「助攻」,老將基斯普見機不可失,快步衝前怒射成1:1。然而,「士哥」後10分鐘,基斯普俾教練文仙尼換走,面露不悅之色兼俾鏡頭拍到,睇嚟佢同教練有啲「牙齒印」,冇面畀,夠薑!
年屆32歲嘅基斯普雖為國米追平,但都唔夠費高威!呢場波係下月4號年屆35歲嘅費高,繼魯爾、卡路士、碧咸、馬甸尼同簡尼後,第6位喺歐聯上陣第100場嘅經典名將,認真唔講得笑!