玩埋今日2013年收爐，相信十個有八個老散腦入面都曾閃過，「如果年頭買咗騰訊（700）、銀娛（027）……就發咗啦」。有早知、冇乞兒，老老土土咁諗返轉頭，不如菲菲都學人玩預測。
科技有進無退，來年唔再「講呢啲」，而係「講3D」。3D打印技術概念相信會炒得更熱。過去一年越來越多工業集團表示引入呢種技術壓成本，最新加入3D大軍嘅有西門子。香港相關概念股暫時缺貨，係得隻昆明機床（300）炒過。但都幾肯定來年一定有公司突然話涉足呢個行業，情況就似世達（1282）做大指紋業務一樣。講3D點可以唔提3D數碼（8078），偶爾借新戲、通告炒作是常識。
Google glass、iWatch來年上架冇走雞，人人手執一件可穿戴科技嘅日子指日可待，咪話唔提你，呢兩件潮物都係由鴻海組裝。
中國人嗜賭，濠賭股今年炒到令呂志和成亞洲第二首富。彩票股今年下半年已炒上去，明年巴西世界盃，散戶對板塊嘅熱情，分分鐘熱過森巴女郎。
最後，今年資產奇葩Bitcoin雖然已被阿爺封殺，但一雞死一雞鳴，只要作個古仔就炒得起的虛擬貨幣，冇咁易玩完。大家食定花生等Bitcoin翻身，又或者騰訊有日甚至將Q幣，打造為強國版Bitcoin。
最後，預祝各位新年快上。

Fifi
本欄逢周二、四刊出

足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24