何潤東同老婆林靜儀(Peggy)今日喺台北補辦結婚儀式，蕭敬騰都有嚟到現場恭賀一對新人，何潤東介紹蕭敬騰嗰時，講笑話：「我是個曾經出國唱片的人，但不紅，所以去拍戲，我身邊是歌王。」蕭敬騰就拿著「貓紙」獻唱《I Just Called To Say I Love You》、《千言萬語》。

之後何潤東換咗蒙古王子裝跳住舞出場，Peggy都以綠色褲裝一齊跳住出嚟，跳完何潤東就換咗白色西裝，2人一齊將紅酒倒進象徵9年愛情嘅冰雕，再加個火辣熱吻。

何潤東講勁感動嘅嘢冧老婆：「有一件事我瞞了Peggy 2個多禮拜，幾乎妳每晚睡著之後，我瞞著妳做一件事，今天必須坦承，一個五音不全、中文不好的我， 嘗試寫了一首歌詞給妳，由陳建瑋老師譜曲。」佢唱嘅創作歌叫《我唱的這首歌》。

何潤東唱歌嗰時，Peggy喺台下喊出嚟，妝都花咗，佢接著又講感性嘢：「我老婆每天會在我床前放杯水，因為她知道我半夜醒來會渴，別人會做很多浪漫的事，我只喜歡妳給我的簡單，一個笑容，看個DVD，開個很傻的玩笑，老婆常說，我都不說我愛妳，但是我，愛妳…希望以後參加我們女兒婚禮時，妳還會想起我唱的這首歌。」