當年今日

股壇瀏覽器:創業板股易炒歸邊

蘋果日報 2002/01/05 00:00


港股噚日勁升278點,有人冇等大市調整至較低水平就入市,有傳聞係中資刻意入市托高,咪畀班外資買到平貨,特別係新一批嘅盈富基金(2800),個市唔跌得,班芬佬焗住要買貴貨,盈富基金噚日再銷近2億個單位,所餘無幾。Cookie話,芬佬已開始增持,等唔切個市調整,升勢將要維持一段時間,主要係憧憬美股喺科技股帶動下上升,港股亦會受惠。

數碼庫要重浮水面
數碼庫(8162)潛水已久,噚日大發神威,不但勁升25.3%,成交金額更高達2217萬元,反映有資金入市炒作。黑客話,今次至少要將股價推高至水面價0.50元至收手。此股招股時配售1.5億股,每股作價0.50元,但有消息話其中4476萬股配售價只係每股0.30元,批貨自然係關連人士至能攞到手,股份上市後,即刻出現震倉,股價質至最低0.175元,可能已經收夠貨,所以噚日就開車。
其他創業板股份亦雞犬皆升,20大升幅中有8隻係創業板股份,大部分都係貨源歸邊,借勢炒上。
銀行成日話搵食艱難,搞到大型證券商紛紛調低銀行股前景。阿虎噚日聽到前銀行公會主席王冬勝話,銀行審批民營企業貸款時要具備有市場知識,所以生意唔易做。
以往銀行淨係識睇住磚頭借錢,大賺特賺,而甚少做企業貸款,𠵱家磚頭唔值錢,資金就冇出路。其實銀行要搵錢,都需要自我增值,增加各方面嘅專業知識,先至可以搵多啲放款出路,咪淨係靠磚頭搵錢,搵唔到錢就炒人。