洪金寶、高麗虹、汪小菲、曉明父母、林心如、竇驍及內地組合TFBoys等，於晚上六點幾左右抵達上海展覽中心行紅地毯，出席黃曉明同Angelababy嘅婚禮。

問及洪金寶送咩禮物，佢就話送個心，咁有咩祝福說話，洪金寶講：「最緊要開開心心!」問到想唔想曉明同Baby快啲生小朋友，洪金寶答：「最好喇!」而汪小菲就單拖到場，老婆大S(徐熙媛)事前已喺微博送上祝福，表示自己今晚未能前嚟。

之後，曉明父母亦以盛裝現身，曉明媽咪表示：「好開心，多謝大家，辛苦大家。」問及曉明媽咪想抱男孫定女孫，佢就話：「都喜歡，龍鳳胎喇!」即令現場主持人大叫：「Baby，你聽到啦!」另外，陳果及夏永康亦一同行紅地毯。