【大叔型大熱】韓國女性最想同邊位男星過情人節?
鬼怪李棟旭朴寶劍情人節宋仲基孔劉
下周二就係情人節了,韓國有網上調查公司就向2千名年齡喺20至50歲女性進行調查統計,對於今個情人節最想同邊位男藝人共度呢個日子。
當中佔20%嘅女性揀咗近期人氣爆燈嘅37歲《鬼怪》男主角孔劉,唔少女性都希望喺情人節當日能夠同孔劉來講約會,唔知佢哋係唔係幻想喺《鬼怪》中,孔劉有個隨意門,隨時可以帶女友周遊列國,唔怪得孔劉輕易成為第一名。
至於第二名就係《雲畫的月光》23歲男星朴寶劍,佢以12%嘅得票率撼贏31歲同門師兄宋仲基,宋仲基去年憑《太陽的後裔》升呢做韓國男神,不過佢之後忙於拍新片《軍艦島》,未有新作推出,所以即時被師弟搶咗唔少人氣,宋仲基以8.1%進佔第三名。
而第四名同樣因《鬼怪》而人氣急升嘅35歲李棟旭,佢喺劇中對劉仁娜咁情深,自然成功為佢吸納唔少粉絲,以7.8%排第四名;第五名為電影《MASTER》嘅36歲男星姜棟元,佢有7.3%嘅得票率。
值得一提係呢五位Oppa中,只得朴寶劍係30歲以下,其他Oppa都過晒30歲,可見呢期真係興大叔型。
除咗過情人節外,喺另一個「最想送朱古力」嘅選舉中,孔劉繼續成為No.1,第二至第四名分別係朴寶劍、李棟旭同埋宋仲基。