E-Kids、 可嵐、劉威煌同龍小菌噚晚喺黃埔出席電影《歌手》首映，其中啱啱去完日本演出嘅E-Kids，三位成員Tommy、Alan同Tim接受訪問時話：「今次日本之行獲益好大，因為明年有機會喺日本推出演唱會DVD，同時亦有望喺當地推出新歌。」

講到明年二月嘅香港演唱會，早前預售門票一推出就賣晒，Tommy話：「好多謝各位支持，今次開兩場比起去年進咗一小步，上年喺唔睇好之下得到大家支持，今年大家繼續捧場，所以都有壓力。」三人又稱今次兩場演出會有全新內容，仲話：「今次公司好好，幫我哋喺紅隧口Book咗個大廣告牌，上次我哋有份喺紅隧口出現已經係2002年魅力移動嘅時候，仲要係八個人，今次係完全屬於我哋三個，應該要去影低。」

至於有份演出電影嘅可嵐，就話首次拍電影，特登帶埋媽咪嚟支持，問到點解唔帶埋囝囝？佢話：「近排天氣轉，所以有啲發燒要喺屋企休息。」早前曾透露囝囝喺學校學中文有困難，所以畀同學仔笑，問到近來情況，佢話：「已經好好多，開始跟得上學習進度，中文進步咗好多，所以嚟緊聖誕佢話希望有部電話可以裝一啲學中文嘅apps，我都應該會應承送俾佢。」

更多娛聞，喺晒《娛果》
http://fb.com/appledailyent