楊曉穎同許嘉浩（Karl）今日喺灣仔拍攝節目，剛喺米蘭返港嘅楊曉穎，佢透露喺當地被人明搶銀包，「嗰日病住去面試，我將腰包放喺環保袋入面，搭地鐵嘅時候，有個好矮嘅女仔明搶我個袋，好彩入面唔係有好多現金，不過就有信用卡、模特兒公司宿舍鎖匙，搞到好麻煩，好彩當地有模特兒朋友畀錢我用，媽咪咁啱又嚟米蘭。」

問到點慶祝平安夜同聖誕節？楊曉穎自爆有新戀情，「拍咗幾個月拖，都幾sweeto架，不過我男朋友o依家去咗溫哥華，因為佢屋企人有啲事。」冇得一齊過第一個聖誕節？佢話：「如果兩個人一齊係開心，就日日都係節日，我男朋友都成熟，大家之間都有份信任。」此外，Karl表示為咗支持環保，今年會以100件舊衫砌棵聖誕樹，然後到31日就會將舊衫捐出。

精選娛聞，喺晒《娛果》
http://fb.com/appledailyent