日本女子組合Morning娘嘅31歲舊將石川梨華,前年承認撻着棒球手野上亮磨,而今期雜誌《週刊女性》就拍得佢偕前棒球名將佐佐木主浩排排坐食宵夜,雖然同枱仲有一對男女友人,不過身為有婦之夫嘅佐佐木曾有婚外情前科,對棒球手情有獨鍾嘅石川梨華,難怪被指搭上人夫。
佐佐木現任太太就係曾演日劇《沒有家的女孩2》嘅息影女星榎本加奈子,10年前兩人爆出戀情時,佐佐木立即踢走正印,同榎本加奈子奉子成婚。事隔多年,石川梨華疑做「小三」介入佐佐木婚姻,對於被拍得老公約石川食宵夜,榎本加奈子接受記者訪問時表現淡定,佢又稱得知丈夫當晚係出席四人飯局,代夫解釋同石川只係飯腳關係,仲大婆身份否認石川係「小三」o添!
Morning娘全盛時期嘅成員幾乎全部已經嫁人上岸,唯獨石川依然未婚,上月佢出席前隊友吉澤瞳婚宴時,就獲新娘子拋上花球,吉澤瞳亦講明希望石川係下一位新娘子。