9歲「小巨肺」譚芷昀(Celine)今日於真人騷《全美一叮》（America's Got Talent，AGT）再亮相參加準決賽，強敵「小雲妮」Angelica Hale、同係唱歌嘅Christian Guardino、跳舞嘅Merrick Hanna一樣都係今日爭出線。而11個參賽者之中，只有5個可以晉身決賽。

而未開始之前，Celine就連同妹妹Dion、阿爸譚順生為節目拍宣傳片。片中見到佢同妹妹四圍行街食好嘢，非常享受美國嘅奢華生活，佢同妹妹Dion仲不停賣萌。最後，兩姐妹現身比華利山莊，於泳邊曬太陽嘆世界，仲拒絕偶像Celine Dion嘅邀請，最後更見到佢阿爸譚順生現身！Celine就話佢好感謝《全美一叮》令佢擁有呢一切。不過成段片就感覺勁炫富，非常離地，雖然段片最後揭示奢華生活都係Celine自己幻想出嚟嘅，不過都已經幾唔討好，令人感覺佢嘅夢想就係發達。