當年今日
關於我們

避免集體走光事件重演 貿發局主動「封鏡」

蘋果日報 2014/01/14 06:00

貿發局

一眾女星及模特兒包括李玟﹑梁詠琪﹑莊思敏﹑江若琳﹑周汶錡﹑TaylorR.﹑周美欣及陳綺明等,噚晚出席由貿發局主辦,喺灣仔會展舉行嘅「香港‧華麗秀2014」,點知發生可能係娛圈史上,眾多女星「集體走光」事件。

事緣大會安排眾星喺佈景板前影相,但唔知邊位高人,喺佈景板下無啦啦加咗塊「蠱惑的鏡」,連累身穿短裙出席嘅女星及女模,包括周美欣﹑TaylorR.﹑陳綺明及江若琳等,均不幸中招走光。當中身穿黑色DeepV連身裙嘅江若琳,除咗露底仲露埋疑似衛生巾,認真冇陰功﹗此舉令「華麗秀」蒙上陰影,變得不華麗了﹗

今日該活動仍繼續舉行,但有關方面已立即作出「封鏡」行動,將佈景板底下塊鏡封住,免再發生女星走光事件。

而I.T方面今日都有活動舉行,發言人表示同貿發局商量後,貿發局主動「封鏡」,而I.T方面以後再舉行類似活動時,會多加留意。

至於貿發局傳媒及公共事務部經理鄭先生,回應事件就話:「已經發生咗,0依家了解中,會作出行動,都知道大家關心呢件事,希望會盡快行動。(封咗鏡喎,仲有乜行動?)詳細行動唔方便透露。(封鏡係I.T要求定你哋主動要求?)呢個唔可以透露。(有冇收到女星投訴?)唔可以透露,但唔想再發生,所以處理中。(咁塊鏡設計係邊個主意?)嗯﹗呢件事發生得太快,所以仲了解緊,我哋會作出處理。」