鄭秀文同任賢齊喺02年合作完《嫁個有錢人》後再度合作，今次佢哋喺許鞍華監製、麥曦茵執導嘅《花椒之味》飾演情侶，部戲仲有鍾鎮濤、吳彥姝、李曉峰、賴雅妍同麥子樂等。

呢部戲喺香港正式拍攝，講到今次相隔16年再合作，小齊搞笑話當年楊過同小龍女都係分開咗16年才重遇，所以搞笑叫咗Sammi一聲姑姑，佢仲讚Sammi嘅造型好有戲味，搞到佢差啲認唔到佢！不過小齊為咗呢部戲可以大犧牲，佢要增肥30磅，雖然Sammi對住小齊話：「冇見咁耐，肥咗又靚咗喎！」不過小齊自嘲塊面啲皺紋都撐開晒。

飾演大家姐嘅Sammi，佢話呢套戲以前嘅愛情片好唔同，本身同飾演爸爸嘅鍾鎮濤感情淡薄，不過經過同賴雅妍、李曉峰兩個妹妹相處，令到佢慢慢學習點樣重拾失落咗嘅親情，佢仲有感而發話：「成個劇本對我嚟講係好新鮮，做演員係一件幸褔事，可以喺唔同時間經歷唔同人生，憑外表都可以為自己創造另一個角色。」

查實喺戲中有一個搭建嘅火鍋店場景，亦都令到成班演員有體會，原來劇組專登請咗師傅炮製麻辣火鍋，結果搞到小齊忍不住口話想食，只係Sammi話怕肥唔敢食！

精選娛聞，喺晒《娛果》
http://fb.com/appledailyent