當年今日
關於我們

【韓流】李敏鎬成功禁止盜用其肖像面膜出售

蘋果日報 2015/09/14 06:00

蘋果香港韓國即時李敏鎬馬油面膜

韓國長腿oppa李敏鎬早前怒告某品牌盜用自己喺韓劇《信義》嘅肖像出售「李敏鎬馬油面膜」、「李敏鎬馬油面霜」,事件今日有新進展。

李敏鎬所屬嘅經理人公司表示:「據首爾西部地方法院喺9月9號下達嘅文件,未同我哋簽署相關合約,盜用咗李敏鎬嘅肖像出售馬油面膜屬違法行為,因此法院已向T社、K社、G社等相關公司提出了禁止銷售嘅處分。」

另外,李敏鎬方面亦都話相關嘅產品將交畀執行官保管,相關產品網站上所公開嘅產品亦將下架,並要刪除產品中李敏鎬嘅肖像。

根據李敏鎬方面代表律師孫錫鋒話:「近期喺市場上流通嘅呢啲產品均屬個別商家未經同經理人公司嘅簽約便擅自製作,呢個行為不僅侵犯咗李敏鎬嘅肖像權同宣傳權,亦對消費者及訪問韓國嘅遊客造成咗一定嘅影響。」

李敏鎬經理人公司方面解釋因為李敏鎬目前係韓國某知名化妝品品牌嘅專屬代言人,因此完全不可能同時代言其他公司嘅產品。希望今後不會再有消費者成為類似情況嘅受害者。

雖然有官非喺身,但李敏鎬今日下午喺首爾出席活動時就心情靚靚,由出場到上台都笑晒口咁,好陽光啊。