今屆嘅亞洲小姐競選，未正式開始選就新聞多多，面試佳麗之一嘅戴莎莎就最出位，除咗自稱同國家主席胡錦濤個仔胡海峰係好朋友關係外，又曾接受傳媒專訪。
噚日亞視公佈港澳賽區12名入圍佳麗嘅名單，戴莎莎以及兩名本地薑女模「嫩版吳美珩」林泳芝同「翻版CoCo」馮鎵瀠都唔入圍。戴莎莎咁識做宣傳都唔入圍，亞姐統籌葉家寶對此話：「第一，佢（戴莎莎）唔符合資格，第二佢網上票數低，一班評判一致決定唔畀佢入。」又話：「我哋唔想有人利用亞洲小姐做宣傳，佢之前太多自我宣傳，可能係佢身邊人喇！其間佢個提名人，又同我哋講有個乜嘢贊助商，贊助佢脫毛，但又拎唔到張合約出來睇，佢真係好多疑團解唔開，票數又低，所以唔入圍。」

指摘過橋抽板

而戴莎莎提名人楊曼莉噚日喺電話中話：「其實莎莎好乖，又唔係要博宣傳，之前係亞姐要佢做《第一手真相》訪問啫，佢哋個訪問太誇張。」楊曼莉言談間覺得亞視有過橋抽板之嫌，佢又話：「莎莎唔係咁恨參選，佢唔入圍都唔會太唔開心，佢𠵱家自由身，有機會都想拍吓戲。」

亞姐港澳區12強