亞視裁員，但轉個頭依家又宣佈舉行「2018亞洲小姐競選——大中華賽區」，話係慶祝亞姐30周年，今日仲喺亞視大埔總台開記招造勢。

本屆亞視首席「內容官」（CCO）何麗全今日單人匹馬回應傳媒，「顧問」吳雨及區偉林就不在。問番何麗全可擔心裁員會影響亞姐選舉？何麗全稱：「之前嘅係自然流失，嚟緊有啲節目有需要都會請番，八月會有公佈啲新形式節目會出街，會請番啲新人。」

預計亞姐選舉能否賺錢回本？何麗全就話：「暫時未計數，因為香港區未開始，不過一定得到好多廣告客戶支持，有信心一定cover到，亞姐一定係亞視全年最大嘅投資項目。」

至於方才提到嘅吳雨同區偉林，今日記招上，亞視首席財務官黎明輝宣佈兩人於本月「友好地」解除合約，黎稱：「兩人已唔係高級顧問，佢哋搞掂開台就功成身退。」再問離職是否因為亞視財困？黎明輝話：「當然無關，鄧先生依然係亞視嘅最大投資者，兩人離開冇影響士氣，亦都冇鬧交。同時宣布亞視債務重組進入最後幾個月，之後會將所有債務還番晒畀債權人。」

同場宣佈「亞視深圳演藝培訓中心」正式成立，進入招生，9月開始授課。亞視深圳演藝培訓中心，正式招收學生，何麗全指學費暫時未公佈，不過有好多唔同科目，但唔會收好多學生，重質不重量，要交學費，同事有演出機會。

黎明輝續指，現在亞視有6位簽全合約藝人，當中包括2016年及2017年亞姐冠軍李思琪及何丹妮。