「不如去食麥趣飯咯？」港男對孫柏文的「測試理論」信到十足，所以第一次約女仔食飯，就去麥當勞，反正有新產品，也大條道理。女子要顯得千依百順，沒有說不。就在這個溫馨時刻，晴天霹靂。「咦，西蘭花有蟲呀！」
港男一看，西蘭花上有幾點黑色，心想：「唓！都唔知幾好蛋白質。」不過，為了安撫女子，男孩強裝鎮定：「哦，好正常啫！西蘭花好多蟲，就係人都知。」
女子雖然不耐煩，但是仍然保持儀態：「係囉，點解仲要揀西蘭花做材料呢？」其實心想：「咁你又揀食老麥！」

迎合Glocalization潮流

港男見到有發揮機會，將在MBA課堂上聽到的，純熟地背出來：「美國快餐業，企業核心競爭力，好多人以為係市場推廣。錯。其實，標準化同物流管理，先至係降低成本、提高利潤嘅致勝之道。近年老麥全球同名銷售下降。幾年前，有報告話要搶攻晚餐市場，再加上潮流興Glocalization。Glocalization，即係全球化咁迎合本土市場，所以就推出適合地區口味嘅產品。我估因為西蘭花供應量夠規模，設計菜單嘅人，順理成章就選擇呢種材料。不過，呢間公司未處理過呢種材料，供應鏈嘅一致性，又因此失去優勢，所以好易發生呢種蝦碌事件囉。」男孩滿心以為，豐富學識，可以挽回一點希望。
女子：「哦？你都識幾多嘢喎。其實你做邊行㗎？」眼中仍帶有一絲欣賞。
港男沉默不語。無奈的事實是，08金融海嘯，做投行IT Support的他被裁；兩年前MBA畢業，至今一直投閒置散。

利世民
http://www.facebook.com/AppleSimon