明將勁敵 TASTE推燒味壽司
有人讚創新 有人呼反胃

蘋果日報 2015/06/25 00:00


【本報訊】明將「地獄壽司」終於出現勁敵,百佳旗下超市TASTE近日驚現燒味壽司,網上瘋傳一張該店出售叉燒、油雞和燒鴨壽司的相片,引起網民熱烈討論。本報在兩間TASTE分店均發現其真身,一盒4件售22至25元,名人試食後普遍認為叉燒太瘦及飯太少不夠飽。有網民讚百佳有創意,亦有人大呼反胃,百佳澄清該產品其實是新推出的「一口燒味飯」。
記者:尹結儀 鍾雅宜

明將壽司早年推出各類顛覆傳統的壽司,包括紅豆軍艦和啫喱糖壽司等,被譏為「劣食」。原來變種壽司無處不在,近日網民Charles Ng在「Tai Po大埔」facebook群組上載一幅攝於超市TASTE的圖片,圖中有多盒以壽司專用透明膠盒盛載的燒味壽司,每盒售25元,有叉燒、油雞和燒鴨等口味,引起熱議。
empty
網民在TASTE超市發現燒味壽司,有叉燒、油雞和燒鴨等口味。互聯網
麥玲玲:男仔會唔夠飽
《蘋果》記者到馬鞍山TASTE覓得燒味壽司真身,有叉燒和鴨胸兩款,一盒4件售22元,每件壽司體積較一般壽司大。食品包裝盒寫上「叉燒飯」和「燒鴨飯」,所謂「燒鴨」其實是煙鴨胸,未見太多客人選購。記者再到九龍塘又一城TASTE,但找不到現貨,最終致電客戶服務部查詢,對方指:「燒味壽司,有呀,不過要訂㗎!我搵燒味部同事同你傾。」燒味部指仍有數盒存貨,指是今年才推售的產品,記者終購得叉燒和鴨胸壽司各兩盒,合共100元。
本報邀請名人試食,曾試食麥趣飯和明將壽司的玄學家麥玲玲認為燒味壽司「難食過麥趣飯,但點都好食過明將,其實係普通燒味飯,可能啱OL食,男仔會唔夠飽」。旅遊專欄作家項明生指此食法不算新奇,但賣相較差,「即係將一碗飯分4嚿」,又指鴨胸壽司較好吃。
empty
TASTE的叉燒壽司配豉油進食,味道與一般叉燒飯無異。馬泉崇攝
empty
TASTE燒味部指燒味壽司是今年新產品。
empty
明將的紅豆軍艦被網民譏為劣食。
百佳稱叫一口燒味飯
飲食專欄作家梁家權認為燒味壽司甚有噱頭,「好多食物都可以做壽司,唔好切得太厚就可以,叉燒就半肥瘦最好,但燒味放得耐會韌或乾,切忌放太耐」。他指現時有火炙壽司推出,故壽司熱食亦非新鮮事,認為雞膶和豬肚亦可製成壽司。
百佳超級市場則指,所謂壽司其實是一口燒味飯,是新推出的產品,由燒味部採用新鮮燒味製造,現時於數間百佳旗下分店發售。翻查資料,10年前美心千燒百味已推出燒味壽司,包括乳豬和油雞壽司卷等,惟現已絕迹。
市民心聲
empty
麥玲玲
「佢好食過明將壽司,但叉燒半肥瘦會好啲,而且太鹹,啲飯好容易散,可能係方便人分飯食。」
empty
項明生
「叉燒太瘦,根本係中式壽司、日式食法,唔新奇,外國都有鵝肝壽司,不過呢個賣相真係差啲。」
empty
顧小姐
「好奇怪,我唔會買,應該係特登將燒味飯整到扮晒壽司咁,都係噱頭嚟。」
empty
唐同學
「梗係買雙拼燒味飯抵啲啦,飯量多成倍,燒味壽司根本唔夠飽,我唔打算試。」
識睇睇留言
Yuk_Ch:咁我不如直接買盒油雞鴨飯。
Esther Cheung:係唔係明將嘅師傅轉咗去百佳做呀?!呢啲人才嚟㗎喎。
Kimchi Helo:下期預告:豆腐火腩之戀、肉餅軍艦、臘腸手卷。
Andy Yeung:這一盒壽司,有叉燒、油雞、切肉,這麼有層次的壽司,得多防着它一點。
Wilfred Kan:幾嚿飯幾嚿燒味就25元,誠哥果然係賺到盡。
錢沛彧:其實件白切雞壽司,我應該點Wasabi定點薑蓉,還是係兩溝一齊點嚟食,我呢一刻真係睇唔透。
資料來源:互聯網