宇宙巨G.E.M.（鄧紫棋）雖然未上太空唱國語歌，但係日前佢就去咗瑞士著名嘅冰雪之巔少女峰唱歌，仲一連唱咗三首，喺網上就有佢當日喺海拔3454米唱歌嘅片睇喇。

睇片就見到宇宙巨G.E.M.唱咗三首歌，分別係《SomedayI'llfly》、《你把我灌醉》同《新的心跳》，正所謂識聽宇宙巨G.E.M.唱歌，一定係聽「X」叫，大家以為佢去到海拔3454米，巨G.E.M.就「X」叫唔到？少年，你太年輕了，G.E.M.話晒都係宇宙級，區區海拔3454米又點會難到佢呢？喺巨G.E.M.唱到《你把我灌醉》嘅時候，就將佢「X」叫展示出嚟，唔會令人失望。

除咗聽覺嘅享受，仲有視覺嘅享受，雖然當日G.E.M.為咗保暖，放棄咗佢最近好鍾意嘅露腰裝同連身裙仔，改咗著一條貼身皮褲同紅色外套，相信佢揀紅色係有原因嘅，因為喺G.E.M.嘅背後，就有一面瑞士國旗同中國國旗，所以話宇宙巨G.E.M.同中國旗真係襯到絕一絕。