曾經係90年代J-pop界紅人嘅日本女歌手相川七瀨，噚晚喺六本木舉行入行20周年嘅紀念演唱會，獲不少樂壇前輩畀面支持，包括杏子、寺田惠子等，不過最驚喜就係唱到Encore嗰陣，相川七瀨嘅兒時偶像工藤靜香都有現身，仲難得同台合唱，搞到相川七瀨喊到收唔到聲。

40歲嘅相川七瀨，原來當年係唱靜香名曲《嵐之素顏》參加選拔賽入行，噚晚佢終於有機會與靜香首度同台合唱，唱出偶像嘅《嵐之素顏》同埋《慟哭》，已經係三子之母嘅相川七瀨，對於可以同「木村嫂」靜香合唱，一時感觸泣不成聲，搞到連靜香都喊埋一份，相川話呢一刻比當年自己婚禮更加開心。今次個唱，相川個8歲大二仔都有上台打鼓為媽咪伴奏。