日本青春女星有村架純來港為《奇蹟補習社》宣傳，噚日已四出宣傳，佢唔止出席圓方嘅特別放映場見影迷，原來仲去埋現代教育體驗做香港嘅補習班學生，見佢坐喺課室嘅樣相當認真，而且與同學們亦打成一片，表現好親民。

到今天，有村架純連趕五場，走訪港九戲院謝票，親身答謝入場支持嘅觀眾同埋粉絲。有村以廣東話介紹自己，盡顯溫柔可愛一面，之後更走到觀眾席同場內觀眾影大合照留念，粉絲情緒高漲，歡呼不斷並爭相贈送禮物，反應熱烈。

有村首次來港，即有機會感受「謝票文化」，佢話覺得好有趣，亦好高興藉此機會同支持者見面。結束今日一連五場謝票後，有村隨即趕去機場返回日本，三日兩夜嘅緊密宣傳行程亦圓滿結束。