側田05年出道後極速爆紅，不足一年已踏足紅館開演唱會，不過，人紅自然是非多，側田亦不例外，是非、緋聞一大蘿，除咗公開認戀情嘅林苑同韓籍女友，同佢傳過緋聞仲有江若琳、G.E.M.、有「翻版楊千嬅」之稱嘅曾雪華、「美女廚房」嘅黃欣等，戰績相當彪炳。

不過，側田自從北上之後回流返港發展，14年情傾圈外長髮女友後，忽然變得修心養性，在公在私都經常同女友孖公仔般出現，上月去吉隆波做騷，亦有帶女友同行。日前（5月20日）讀者王先生發現側田同女友喺香港仔冒險樂園玩，甜蜜指數爆燈。

讀者王先生透過「爆相爆片」向《蘋果》分享喺冒險樂園影到側田同女友嘅相片，王先生接受本報訪問表示：「我同老婆大約夜晚八點半去到，嗰時側田已經喺度，同個長髮女仔一齊夾公仔，見佢哋都有啲收穫，部部機都有夾吓，側田都有幫手。」王先生又話當晚自己9點鐘離開，側田同女友似乎未有意欲走，仍然好投入咁夾公仔。

精選娛聞，喺晒《娛果》
http://fb.com/appledailyent