開心嘢唔好畀佢停！政壇變色龍劉江華喺立法會選舉超級區議會界別落選，唔單止全城狂賀。呢個政壇喜訊，噚日仲衝出香港，紅遍全球，高興到連紐約港人都發賀電，喺地鐵度貼上「海外港人（紐約）聯誼會熱烈慶祝劉江華落選」嘅海報。喺香港，有網民就將「熱烈慶祝劉江華落選」嘅海報貼喺私家車玻璃窗，等自己行到邊，都可以向身邊嘅人分享呢份喜悅。

網民激動瞓唔着覺

劉江華唔單止喺香港、美國有朋友，有網民更將金正恩幅受到學生哭泣擁護嘅靚相，key上劉江華個頭，讓北韓人都可以對政治人物下台有一份期盼。唔少網民都激動到瞓唔着覺，深夜電腦開住劉江華落選嘅相片，再喺螢幕前放杯靚酒影相放上網，向劉爺爺賜酒「道賀」。點解劉江華下台咁得人心？無他嘅，網民一人一句，回憶佢喺政壇嘅變態金句，好似當年泛民對截取通訊條例提修訂，佢就話「 一條都唔可以通過」。雷曼事件，佢喺立法會外話「民建聯一定會幫大家撐到底」。點知係議會內就對成立專責委員會投反對票。做咗咁多「好事」，到今日下台有咁多人拍手，都真係應得嘅！mailto:[email protected]