張智霖（Chilam）同鄭欣宜啱啱去咗北京，出席一個名為「2015金票根圓夢盛典」嘅電影活動暨頒獎典禮，仲搵嚟台灣名嘴吳宗憲擔任司儀。

一身西裝打扮嘅Chilam仲梅開二度，憑住《十月初五的月光》「初哥哥」一角，獲得「演繹傳神獎」同「浪漫愛情獎」兩個獎，Chilam話雖然近來一直忙緊籌備下星期舉行嘅廣州演唱會，但既然「初哥哥」有獎攞，所以點都要抽時間嚟出席。

至於欣宜就係活動嘅表演嘉賓，負責唱兩首歌，一向怕熱嘅佢，去到0依家零度以下嘅北京，即刻嗌晒救命：「真係好凍呀，由於我一向熱底，所以冇羽絨褸，只能夠帶厚褸去北京，但都保唔到暖！」仲話返到香港後要即刻去買件羽絨傍身。