當年今日
關於我們

【創業起義】識正面睇 更富生命力(尹思哲)

蘋果日報 2019/12/24 15:00

創業起義尹思哲

去到年底,好多媒體都做大事回顧,香港人今年好勁,夾係美中貿戰中間,做咗國際焦點,曝光率爆晒錶,我哋connect全球,仲差少少做埋時代年度風雲人物。
但風光背後,亦付出沈重代價,我諗好多香港人,此刻都百感交集,無咩心機慶祝今年聖誕。
直至近兩日,聽見警民關係科話「正面去睇曱甴都好有生命力」呢句,當堂成個人醒晒,要衷心多謝講呢句說話嘅譚sir,因為的而且確,好多事識得正面角度去睇,識得觀念轉移,心情真係會放鬆好多。
就例如話,成立獨立調查委員會,雖然好多警察唔贊成,但正面去睇都係還警察一個公道嘅大好機會;警員被起底,正面去睇亦有助加強警員保護個人資料意識,不失為另類在職訓練。
警隊凍薪唔加人工,正面去睇代表警隊有誠意同香港人一齊共渡時艱,若警隊自願減薪5%甚至更多,正面去睇更加係修復警隊形象嘅大好方法,其實諗深一層,只要減少少人工,警員以後休班行街食飯去旅行,唔使隨身攜帶伸縮警棍,可以真正放鬆心情,享受放工嘅樂趣,正面去睇實在係除笨有精。
至於星火同盟籌嘅7000萬資金,正面去睇因為提供咗一個平台,俾市民科水代替上街,換言之亦係鼓勵和平非暴力表達訴求,實質係幫緊政府,無理由要被檢控同凍結。
相反,警控星火洗黑錢,正面去睇,則係倒轉鼓勵和理非變返勇武,繼續走上前線體驗生命;如果各種裝修活動因而再度活躍,正面去睇可趁機換掉老舊器材,令工作環境更加盡善盡美,而且維修亦能為社會創造就業。
今屆立法會,前後DQ總共8位議員,正面嚟睇可以減少市民對議會政治依賴,以實際行動及鈔票,建設黃色經濟圈甚或黃色虛擬貨幣。
事實上,香港人罷睇TVB,杯葛唔幫襯美心等藍店,正面去睇其實亦係響應政府呼籲,以實際行動支持及鼓勵佢哋北上開拓大灣區龐大商機,唔駛在兩邊市場搖擺不定,能專注放手一搏,正面去睇係塞翁失馬焉知非福。
可以話,凡事識得正面去睇,已變成香港人生存法則,呢句唔係講笑。
尹思哲
investMAN
For People of Style & Substance
掌握理財智慧 感受生活品味
http://investMAN.hk