人與人之間的初次會面，第一印象往往十分重要。在社會工作，求職者在面試時的表現，就成為面試官是否取錄你的關鍵，所以面試在求職中佔有十分重要的位置。《青雲路》在6月尾舉辦《職場大贏家》的免費講座，公關公司W.O.W Things的創辦人Fiona會擔任演講嘉賓，分享自己的經驗及面試技巧，讓各位求職者可以有所得着，從容面對各個面試。

對於一眾要尋找工作的人士，作為老闆及轉過不同公司工作的Fiona，就有一些面試心得可以分享，她認為好的心理質素是非常重要。「好多人見工會好驚、好緊張，呢種緊張感會影響到你面試時嘅表現。其實可以嘗試轉個角度，當自己去相睇，傾下偈，睇吓雙方面合唔合適，而唔係你求緊份工，你就會冇咁緊張，同時可以令你思考番呢間公司嘅文化係咪適合你，亦會令你之後嘅工作做得更耐。」

Fiona身為公關公司W.O.W Things的創辦人，她表示很多事也會親力親為，與同事一同拼搏，「公關嘅工作雖然主要係幫客戶處理對外關係，但工作好多元化，要見客開會、籌備event、set場、寫新聞稿、聯絡傳媒及安排人物專訪等，我都會與同事一齊落手落腳去做。」

在加拿大做主持
對節目主持有憧憬的Fiona，在加拿大多倫多修讀傳理及社會學，其後成功加入當地的中文電台擔任電台節目主持，「讀大學時，我已開始喺電台做節目主持，畢業後都繼續做，前後做咗6年，工作好平穩，但自己覺得想趁後生有更多唔同嘅嘗試，及有新衝擊，開始考慮轉工。」

04年，Fiona決定回港發展，「想返嚟睇吓有乜嘢發展機會，自己有籌辦活動嘅經驗，於是想搵有關搞event嘅工作，之後入咗一間廣告公司做活動籌委，但原來呢個崗位要做埋PR嘅工作，令我有啲措手不及，因為自己對呢方面唔熟悉。」

搵記者前寫講稿
Fiona表示初接觸PR工作面對不少難題，「當時連香港有乜嘢報章雜誌都唔清楚，於是開始每日去報紙檔買晒啲報章雜誌，拎返屋企睇，了解各自嘅內容及會有乜嘢欄目，方便之後聯絡。另一個難題係邀請記者做訪問，好驚表達得唔清楚，俾佢哋拒絕，於是我打電話前，會寫好2、3行嘅講稿，練好先再打電話聯絡記者，務求喺最短時間講番點解呢次會搵佢哋，同有乜嘢採訪角度。」

其後Fiona去過4間不同的PR公司工作，直至12年，Fiona希望放多些時間在家庭上，於是辭去全職轉為自由工作者，「PR工作OT好平常，有時搞event，仲會捱幾晚通宵。當時個仔1歲，想多啲時間陪佢，於是決定轉做PR嘅freelance，喺屋企工作，初時我嘅工作唔多，都係慢慢累積人脈及信譽，之後喺13年成立公司W.O.W Things，方便同客傾生意。」

現場執生防災
PR最害怕是遇上公關災難，Fiona表示幸運地並沒有遇上，除了事前準備工夫要做足外，良好的現場執生能力，也可避免公關災難發生。「前排有客戶搵我哋幫手籌辦一場300人嘅晚宴，原以為所有嘢都安排好晒，點知當晚好多參加者帶朋友嚟，最後多咗成百人。我哋即刻要同酒店安排加添座位、增加食物分量等，而其中有道菜係原隻鮑魚，因為係預先訂， 臨時加唔到，我哋叫廚房將鮑魚切片上，令每個賓客都食到，最後晚宴都順利完成，個客都滿意。」

發展到現時，W.O.W Things有6名員工，合作過的機構包括Gobee Bike、Uber Eats、EGL等，Fiona希望公司會有更好的發展，「現時我哋嘅客戶主要有科創、教育、健康及金融方面，嚟緊會想與更多科創公有合作嘅機會，因為同呢類較新業務嘅公司合作幾開心。除咗香港嘅生意外，會打算發展新加坡方面嘅業務，令公司有更多嘅發展機會。」

搵好工，即上 http://www.ecjobs.com.hk