港鐵行政總裁周松崗做埋今個月就退休嘆世界，臨別秋波，噚日好罕有咁同傳媒傾吓偈，仲請記者食佢至愛嘅蛋撻同菠蘿油。周生話佢退休之後唔會離開香港，只會做吓非執董。至於會唔會從政，或者加入下屆政府，佢就斬釘截鐵話一定唔會，因為冇經驗、冇能力、冇興趣。唔知係咪唔使do心情特別輕鬆，佢仲退休吐真言爆咗句：「商界從政嘅人，冇一個成功！」呢句話令八方即時聯想起豬狼，唔通周生都想表態？點知佢即時補飛話「只得唐英年一個例外！」不愧係老江湖，佩服！佩服！