16位「五迷」一早喺尖沙嘴通利琴行正門，手挽手排隊，以防有人插隊，點知9點20分有工作人員叫啲fans排去箭咀牌後排隊，先可以開始賣飛，16個來自大陸嘅「五迷」即走過去再排隊，而一班南亞裔人士企咗喺箭咀牌前。

直至10點35分，工作人員步出準備派籌，點知前排嘅南亞裔人士疑似越加越多人，南亞裔人士聲稱自己每人有十個朋友，職員即話：「10個？你唔好話有一百個，再係咁我唔派於是停止派籌。」

現場歌迷同工作人員爭論緊派俾綠色箭咀前定後嘅人，因為南亞裔人士企喺箭咀前面，現場fans即大叫：「係你哋自己話要喺箭咀後排隊，點解會派籌俾箭咀前面嘅人呢。」擾攘咗一陣，職員同佢哋講唔搞掂秩序，否則唔派籌，職員再出嚟派籌俾頭4位南亞裔人士，同埋跟隊後嘅6位大陸fans，安排頭10個入內。

當時無綫主播利穎怡幫排綠色箭咀位後面嘅人出聲，稱安排有問題，點知職員即話：「你唔係排隊嘅，唔好出聲。」