【新增動新聞】
香港國際機場，平均每年處理400多萬噸貨運，全球貨運流量仲連續7年位居世界第1位。唔少港人出遊前後，行李都會經過托運呢一關，但係你又有諗過你嘅行李會有咩待遇？

網上近日流傳一條影片，有外國網民稱喺香港國際機場拍攝到一段地勤人員「處理」行李嘅影片。片段可見有着上螢光制服嘅人員將至少10件行李丟上行李車。由影片睇到，似乎就對相關行李不太友善。

上傳影片嘅人除咗標籤拍攝地點係香港國際機場，仲附上留言話：「呢個就係我哋心愛嘅行李被對待嘅方式，我拍喺今朝（27日）當我嘅飛機着陸嘅時候拍攝。」

影片Post出唔夠兩日已經有1,900幾個shares、300幾個留言、同600幾個嬲嬲。

有網民就覺得地勤人員「好似唔忿氣做咁」、做到黑口黑面咁。不過都有網民撐話呢類苦差唔怪得啲地勤人員「有啲工有人肯做已經偷笑」。亦都有網民發現片中有4個人員，但就得兩個落手做嘢，講笑咁話：「4個人（得）兩個做~唔黑（面）就奇。」

其實呢類事件喺世界唔同地方都時有發生，好似今個月22日，英國曼徹斯特機場就有行李搬運員「掟篋」，不過今次發生喺香港就比較罕見。（另見2018年9月22日報道：機場搬運員攞行李出氣？大力向後掟跣落地都唔理 ）

機管局回覆《蘋果》指非常關注事件，已即時聯絡有關行李服務承辦商了解事件。機管局指香港國際機場的行李運輸服務由航空公司聘用的服務該承辦商處理。機管局又表示已提醒承辦商有關處理行李的安排， 並加強對員工的指引及監察服務水平。

網民點睇

Kwok Ip Kam：預咗喇，好多香港人做野嗰陣都好似唔忿氣做咁。
Ken Choi Yuk Lun：做到口黑面黑，唔多想do咁喎，感覺做嘢無力無生氣。
Rain Wong：唔通對住啲行李笑騎騎同佢傾偈咩？
Qua Bona：人工低冇前途冇希望係咁，比着你都黑口黑面啦。
靴拔ハーバート：有啲工有人肯做已經偷笑。
Chun Hing Ma：4個人（得）兩個做~唔黑（面）就奇。