有「抽水大王」之稱嘅官永義，旗下高山企業（616）上個月出咗個公告話買咗新創建（659），當時以買入價11.198蚊掃咗60萬股，使咗差唔多671.9萬蚊，原因好簡單，就係個價具吸引力。

當時環球股災未出現，而新創建股價舊年下半年都跌得幾殘，華華都同意個價係值得吸納嘅；但點知個疫情愈演愈烈，全球出現大股災，新創建都未能幸免曾經低見7.31蚊。

結果，官永義噚日畀個市震走咗，以7.383元賣晒60萬股，短短個幾月間蝕咗差唔多229萬蚊。不過慘豬豬嘅係，新創建今日股價大反彈，升18.9%至8.98蚊，如果佢睇啱時機沽，一日可以蝕少100萬蚊，不過投資冇如果，華華希望佢下次睇市可以再準啲啦。

李華華