政圈呢期盛傳前特首梁振英頻頻就「港獨」發炮，無非為咗喺下屆2022特首選舉，捲土重來；一旦689又爭入閘，屆時特首林鄭月娥要爭連任，相信都唔係咁容易。但講到尾，喺呢個極小圈子選舉下，有冇機會坐上特首寶座，都係靠阿爺嘅欽點㗎箒，所以要贏阿爺嘅歡心，似乎都係關鍵。喺呢一點，娥特都唔執輸，向解放軍大送高帽，肯定都會獲阿爺畀like。

叫港青學解放軍愛國愛港

林鄭噚日朝早出席粉嶺新圍軍營舉行嘅香港大學生軍事生活體驗營舉行結業禮，佢喺致辭時提到，相信參加訓練嘅同學同長官，已經建立咗友誼同默契，亦明白到中國人民解放軍駐港部隊係維護「一國兩制」同香港安定繁榮的強勁後盾，期望青年人學習軍人愛國愛港嘅精神，相信同場嘅解放軍駐港部隊司令員譚本宏、中聯辦副主任譚鐵牛等，聽完一定冧到暈。
林鄭同時提及，去年發表嘅施政報告，已提出多項建議，希望年輕人對國家同世界各地嘅發展形勢，有更深入嘅認識，包括將香港卓越獎學金計劃恒常化，增加學生去內地、「一帶一路」國家以至世界各地嘅實習計劃等，又再hardsell自己做咗幾多嘢。
呢個軍事營據知連續第8年舉行，今屆約有160名大學生參加，喺13日活動營中體驗解放軍駐港部隊生活，又接受步操、激光模擬射擊等訓練，仲可以坐護衞艦出海㖭。


李八方