現年39歲嘅韓國女星李娜英，大前年與男星元斌結婚，並於同年12月升呢做媽咪。今年李娜英復出幕前，除了拍新片《Beautiful Days》外，又落實孖李鍾碩出演tvN新劇《浪漫是別冊附錄》。

李娜英近日接受韓媒訪問，由於之前有成6年冇拍戲，加上私生活好神秘咁，李娜英就話：「大家都覺得我好像有什麼咁，結婚後也經常問：『李娜英喺休息嘅時候到底做咗乜嘢？』真係冇乜嘢。」李娜英話喺過去嘅6年，佢除咗湊仔外，亦會做家務，又會召開作品會議，強調自己唔係刻意保持神秘，就連看起來特別嘅婚禮亦唔係特別策劃，自己同元斌都唔會計劃啲乜嘢。

李娜英笑言同元斌都係好囉囌嘅人，大家對話次數好多，感覺二人就係世界上最親近嘅朋友一樣，即使對兒子，二人也如朋友一樣。對待育兒方法，佢同元斌都一樣：「我哋唔係規劃遙遠嘅未來，就係想集中精力做我能做嘅事，唔係擔心送去邊間幼兒園，讓孩子學習乜嘢，計劃乜嘢，重要嘅係想讓孩子好自然成長，其他有乜嘢，以後會點先再算。」

喺《Beautiful Days》中李娜英做脫北者母親，片中表演得到久違嘅稱讚，令佢覺得很有負擔，佢話：「雖然今次係我事隔好久再次演戲，但因爲劇本很好，所以也有可能更加投入。」

精選韓流，喺晒《娛果》
http://fb.com/appledailyent